الله يسامح غلاك ويلعن الحاجه . .

غيبتك لو هي دقيقه تعتبر صده . .
الوقت عقبك سجن . . وغيابك اسياجه . . .


لا تعتذر لي ترى ماعاد في شده . .
اعيد حكي ٍ . . يكود الصدر مخراجه . . .


دامه يوصّف بجود ابيك وبجده . .
وشلون تبخل . . على المجروح بعلاجه . . .


ووشلون قاوااك قلبك رده وصده . .
مع انه بيّن عليه الضعف والحاجه . . .


ياقو قلبك برد ايمينك ورده . .
بخلت بمصافحه . . وارهيت بحراجه . . .


لو ماسقى غيم عينه جرهدي خده . .
تراه يبكي . . وقلبه يلحق اخلاجه . . .


ولو شفته يمازحك تراه من جده . .
الضحك عن . . درب ضيق الصدر ماعاجه . . .


غير الوله والغلا عليك وش حده . .
يادرب ليله ويامسراه وسراجه . . .


كنّه يعرفك قبل يلقاك من مده . .
مع ان مابينك . . وما بينه امواجه . . .


هواك بدو ٍنووا للقلب بالشده . .
ورياض قلبي لشوف البدو محتاجه . . .


والوصل بحر ٍ متى انت بتسمح ابمده . .
السيف صبري . . وبحرك شح بامواجه . . .


قصيدي اللي قريته واللي اعده . .
قديم . . لا يزعلك معناه واخراجه . . .


وفراغ قلبي غلاك ارهى على سده . .
ليتك تشوف الغلا . . وابراجه وعاجه . . .


اقوى رياح العذل ما تقدر تهده . .
والا الجفا . . لو تنفس هدم ابراجه . . .


تغانم الوصل لن البعد لابده . .
ياتيك في يوم . . ثم ياخذك بادراجه . . .


اللي لي انك تلين وتترك الشده . .
واللي لك . . اني ماسولف بك لهراجه . . .


ولاني بزعلان واللي نرتجي مده . .
يا باب قلبي . . ويا قفله ومزلاجه . . .


زعلة تغلي ومن تزعله من قده . .
ما دام كل ٍ . . يبي دربك ومنهاجه . . .


غالي وتبخل علي وتطّول الصده . .
الله يسامح غلاك ويلعن الحاجه . .